niedergeschrieben von Willi Mallon am 15.03.1987

Wat dorbie rutkümmt, wenn uns Straaten und Hüüs von fröher vertellt. 

De Niee Straat

Dor ick in de Niee Straat grood worn bünn, will ick een beeten ut de twindiger Johrn vun dat vertellen, wat ick öwer de Straat und de Anwaaner weet.  

Weer will hüüt noch glööben, dat dor öwer dörtig Geschäfte und Gewerbe-betriebe ansässig wess sünd, natürlich weer aln′s nie so opwendich wie hüüt, aber eer Utkamen hebb de Lüüd ok hat. Dor weer as erstes Huus de oole Sporkass. To de Tied noch mit een Vörgoorn. 

Gegenöwer har Discher Bülk sein Möbelladen und de Werkstatt. Neben de Sporkass stünn dat lüdde Huus von Tüffelmaaker Wehling mit nen hübschen Laden und de Werkstatt.  

Dat neechste Gebäude gehör Krohn, de har dor ne Magarinefabrik und stell de „Echte Krohn" heer. Dat Pund to 25 Penn.  

Op de anner Straatensiet weer de Amtsgerichtspark und an de Eck vun de Pankookenstraat waan Lehrer Thun.  

Na de Margarinefabrik keem dat Huus von Uhrmaaker Schlüter. Hein Nüten sän de Lüüd to em.  

Dat neechste Huus gehöör Arthur Heese. Arthur föör mit Margarine öwer Land und in denn Laden har Babutsch Hansen sien Frisörsalon. Wo hüüt Teendoktor Westfahl waant, hett domols sein Grotvadder de Lüüd de Teen trocken. Dat weer schlimmer as hüüt.  

An de Eck von de Hohenwestedter Straat har X. Oberdiek sien Kolonialwarenladen. Dor geev dat eenfach ahln′s, wat man sick denken kunn. Vör mien Grotvadder heff ick öfters Bruun-Beer und Kööm haalt.  

An de anner Straateneck weer dat Waanhuus von Grell, denn ok de Möhl gehöör. He waan dor mit sien beiden Jungs, de schon öwer 40 weern und beide keen Fruu harn. Wie vertellt wür, hebb de 3 de meisten Geschäfte in de Kark bedreewen, door dreepen se ja ok Sündagsmorgen veele Buurn. As Paster Fritz mal in sein Predig utreep: „Und die Sonne, die schien so grell", hebt de Grells glööf, se weern wull to luud wess bie eern Handel und hebt denn Paster um Vergebung beeden.  

Dat Geschäftshuus an de Kirchspeelstraat weer fröher een Kohstall, daheer ok Pankookenstraat.  

Dat Huus neben Grell gehör Wommelsdörp. Hannes-Schooster stünn veel vör de Döör to klöön. To doon weer uck wull nie veel.  

Gegenöwer weer dat lebhafter. In de Meieree von Ludwig weer schon fröh Hochbetrieb. Kort na sööben föörten Willi und Paul Kaufmann luud klingelnd mit eern Melkwagen to Stadt.  

Neben Ludwig an de Straateneck weer de Höökerladen von Fruu Schwarz. Se wer man lüdd und rund, aber bannig luud. Kinner möch se nie geern. Gegenöwer haar Wientapper sein Schlachterladen, veel loos weer dor nie. Wo hüüt Hans-Detel Wommelsdörp sien Tabackschopp hett, weer fröher die Zigarrenmaakeree von Röschmann.  

In dat Huus dorneben leeften 2 öllere Fruuns dürch Kaffeebrennen. Ut Gassenkörner rösteten se denn besten Kornfrank-Kaffee. Dat kunn man wiet rüüken.  

Gegenöwer waan de Händler Holm. Mit wat he handelt hett, heff ick vergeeten.

Dorneeben weer de Laden vun Geschwister Hein. Dat weer ne Sattleree. Utstellt weern Leddersaaken.  

An de Eck von Holtkamp har Hans Harder sein Tabakwarenladen. Vör mien Vadder heff ick dor Schwatten-Krusen köff und vör mie Zigaretten to 1 Penn dat Stück. De hebb wie Jungs an Galgenbarch schmöök, bett uns schlech wür.  

Op de anner Straatensiet har Fruu Hein eern Höökerladen, dor geev dat meistens nen Bonscher to. Eer Mann, Fiete Hein, weer Sattler und Polsterer, he har sien Werkstatt achtert Huus.  

Dat Huus dorneben gehör Holtpantüffelmaaker Möller. Hüüt ward in denn Laden Ies verköff. Und wo jetzt die niee Parkplatz is, weer de Autschlosseree vun Rüschmann und Delfs. Dor harn 4-5 Schlosser eere Arbeit.  

In dat lüdde Eckhuus an Holtkamp waan Hinnack Pahl mit sein Familie. He har ne Kieskuul an Kuckuckswech. Mit 1 Perd und Wagen hett he Kies und Sand föört. Nebenan weer nur een Waanhuus. Willi Bockelmann is dor ers später introcken.  

Denn keem Spinner Rohwer. De Spinneree leech still, aber de Fabrikschornsteen stünn noch. In denn Laden hett Fruu Rohwer Kleedung und Strickjacken verköff.  

Gegenöwer an de Straateneck stünn een uurooles Buurnhuus mit een Strohdack. Dor har Detlef Hamann een Laden mit Fisch, Obst und Gemüse. Detlef sülm und sein Fruu Triena trocken dachdäglich mit eere Fisch- und Gemüsekaar dürch Nordörp. Söhn Richard weer Verkööper in denn lüdden Laden und ick weer sein Assistent. Wenn Richard een beeten Geld innahmen har, müss ick vun Hein Scheppmann Hotte-Hüü-Knackwuss haalen. De hett so good schmeck, dat mie noch dat Water in Mund tosaamen löpp, wenn ick nur dorann denk. Detlef Hamann weer vereidigter Utklingeler. Wenn wat bekannt to geben weer, tröck Detlef mit sein groode Klingel dörch Nordörp und reep dat ut. He kunn ok hockdüütsch.  

Wo jetzt Spies is, weer fröher Fiete Elsners Schlachteree. Fiete weer so, wie man sick een Schlachtermeister vörstellt, rund, dick und ümmer vergnööch.  

Dat Huus von Zigarrenmaaker Mehrens exesteert ja nun ok nie mehr, dor kann man jetz Autos bekieken. Domols har Malermeister Korl Lange sien Werkstatt dor.  

Dat neechste Huus gehör Schooster Räuten (Ratjen). Bie em in de Schoosterstuuf heff ick mie geern ophooln.  

To uns lüdd Huus gehör ne Stellmaakerwerkstatt, de hett mien Vadder to ne Waanung utbuut.  

Denn keem de Krooch „Zur scharfen Ecke" dat weer Bäcker Thun sien, dorto har he ok noch de Bäckeree. Siene Stuuten schmeckten eenmalig good. Dat in de Niee Straat nur een Krooch weer, is meis ein Wunner. Wie harn domols öwer 20 Gastwirtschaften in Nordörp.  

In dat Eckhuus an Höhnerbarch har Hinnack Bütt sien Fisch- und Gemüseladen. He weer de Brooder von Detlef Hamann. De beiden kunn sik aber nie rüüken. Späder is he as öllster SA-Mann in ganz Düütschland bekannt worn. Fiete Elsner sä ümmer „Kiek dor kümmt Hinnack in sien Schäädbüx.  

Dat de niee Straat schon ümmer rech reechsam wess is, geit wull ut düssen Bericht hervöör. De Straat sülm weer mit Feldsteen plaastert, aber de Bürgerstiech weer schon verklinkert.